Poesia di Natale (in vernacolo).

Natale
(Presepio in Costruzione)


Ma che fai? Addò miette stu’ craparo?
Chillo te leva tutt' 'a visuale!...
S'ha da mettere accanto all'animale!
E leva 'a lloco chistu zampugnaro!

E addò se schiaffa? Ma, cretino caro,
che d'è, presepio, o fosse funerale?!
Comme! Uno appriesso all'ato! 'O castagnaro,
'O scartellato, 'O turco e 'O speziale?

Distribuisci! Fanne una scenetta!
Nu gruppetto c'almeno fa figura!
Che significa, llà, chella carretta?

E chella pacchianella dint' 'o sciallo!
Chella! Chella che porta 'a criatura!...
M' 'a piazze sott' 'a coda d' 'o cavallo!

Ma c'aggia fa'! Me state mbriacanno
in tal modo, ca perdo' e ccerevella!
Zi Pascalino ha da fa' che sto ogn'anno!
E vattenne, ca si' na muzzarella.

Stai da tre giorni in casa, revutanno
e nun me sai ‘nculla na casarella!
Comme! Tu vide ca te sto ajutanno,

e fai l'atto 'e superbia e l'angarella!

L'aseniello addo sta?.. Ma che ne saccio!
Le stanne danno na mana'e vernice...
E San Giuseppe? Le manca nu vraccio?!
E'o voie? È senza corne? E comme va?
Tu nun me siente? Bestia! Che ‘nne dice?

'E ccorne?.. Addimandatelo a papà...


FERDINANDO RUSSO